|
g-Urmì-šˈ xa ⁺wadàˈ g-juwè məllətyé-š ya-xábra šəmyə́nneˈ bằleˈ čún áxni aqə́rwa welànˈ ⁺b-jamátət nòšan,ˈ ⁺kaló ki-ədyáwa gáat belà,ˈ ⁺rába əntəzā̀r kwéwalu ki-bratá,ˈ ya-⁺kalò,ˈ bronà yádla.ˈ ăgár bratà yadláwa,ˈ nāš-⁺sálma la-kwə̀lwala,ˈ ⁺yani gnahàw-ile.ˈ baá bratà ydə́lta?ˈ bod-má bronà la-ydə́lta?ˈ əl-⁺daàw-əš xazewaláˈ gállaw áxčàˈ magón našé là maqéwaˈ kəmríwa ⁺salmá komulà mdéla bratá.ˈ bắle ăgár bronà yadláwa,ˈ kəmríwa ⁺salmá xwarì mdéla bratáx.ˈ āt-⁺salmàx hawé xwará.ˈ jwā̀n bráta ⁺mərwítat.ˈ awwalmənjìˈ yadolàwˈ bronà yadə́lla,ˈ broná-š gdèwa,ˈ awwalmənjí əlkí m-kohenè šaqlíwale.ˈ pədyòn godíwa baéw.ˈ
b-tmanyà yoméˈ bàra-šˈ bəgzàre godíwa.ˈ yá bəgzarèˈ godíwala bélə d-ay-brònaˈ ya gáat knəštà.ˈ ⁺rába áy xazoè-wela.ˈ sàndaqˈ hammešàˈ dádət áy ⁺hatā̀n xadə́rwa,ˈ ⁺yà dádət ⁺kaló.ˈ ắgar dadə́t ⁺kalòˈ sandàq xdirá hawéwa xa-záa,ˈ gắrag dadə́t ⁺hatā̀n sandáq xadə́rwa.ˈ yá dádət ⁺hatā̀n sandáq xdíra hawéwa,ˈ dádət áy ⁺kalò b-xadə́rwa.ˈ bằle,ˈ ắgar tunnùˈ sandáq xdirá hawéwa ga-awwàl,ˈ m-xá-danka famìl,ˈ m-xá-danka məšpaxàˈ kawòd kwíwaleˈ wa-godíwale sandàqˈ gáat knəštà.ˈ mqélan reš-d-ód kí ⁺kalòˈ ki-bratá yadlàwaˈ jùwe šúla-š godíwa.ˈ ba-xátrət ki-juwé-⁺wada broná yadlà,ˈ jùr ba-júr ixále báaw kwíwa,ˈ ⁺tàwa,ˈ dušà,ˈ gal-gozè,ˈ gal-pàlu,ˈ gal-qə́nnət gozèˈ gal-⁺nabā́t ⁺mərdixà,ˈ gal-jùr ba-júr ixalé.ˈ ó-jur xə́lye mə́lye godíwa kwìwa báawˈ kí xa-xèt-zaaˈ ⁺xasàw qawéˈ bróna yadlà.ˈ bắle ăgár ò,ˈ aynè šulé godíwalu,ˈ bratà-š yadláwa,ˈ tremənjí zaá-š bráta yadlàwa,ˈ ⁺m-trosa gdé-imara kìˈ áy ləbbá qyalà-welaˈ kí mà-jur xadráwaˈ kí xa-xèt-zaa-š bráta ydə́lta?ˈ bắle ắgar bronà yadláwa,ˈ kəmríwa yelèˈ ayné ixalé báaw hwə̀llan,ˈ ⁺xasàw qwéle,ˈ bronà ydə́lla.ˈ ò-jur-inanˈ ayné yomanú mapirìwalu.ˈ bălé ⁺barúx haššèm,ˈ əlhá bélew ⁺àwaˈ ə́dyom kullàn ayoléxˈ kí bratá bronàˈ yá gnáhət bratá lèwe,.ˈ yá bronà b-yadláˈ yá bratà.ˈ |
|