|
baté Kurdəstā̀nˈ kŭ́le ʾajùr-yeluˈ xə̀št.ˈ təqrà-čˈ ga-doká kŭ́le ʾilanè-yelu.ˈ ʾilanè mandénwa réša garé.ˈ bàr-d-oˈ pušè mandénwa rešéf,ˈ ya-ḥaṣìr mandénwa rešéf,ˈ ya-pušè,ˈ ya-gaḷaè.ˈ ʾilané xelapá mandènwa-uˈ ṭiná dărénwa rešèf-uˈ ṭiná ba-tunà.ˈ koliwále ʾămètef-uˈ kménwa ba-rešèf.ˈ ʾòaˈ zəndəgiyú ba-d-ò-yele.ˈ batú rába moḥkám là-yelu.ˈ wắle g-áy ʾaxər-òˈ bár qrawá-e benulmălălí ʾawàḷ,ˈ našé máre doltá xìri-uˈ xa-baṣór púḷ píl ga-ʾilù.ˈ hiyèn-uˈ baté trə̀ṣlu,ˈ ʾajùr,ˈ ba-ʾajurkarì ḥaštá kolíwa.ˈ ʾajúr mà-yela?ˈ ʾé xə̀štaˈ lablíwale matwíwale ga-kurà.ˈ kuré maqlìwa.ˈ mən-d-óa šaqlìwa.ˈ xet-ʾó lá toràwa.ˈ ʾòa moḥkám-yela.ˈ ba-d-òa tarṣíwa.ˈ binaġắte batú-č ba-kepé čwarpaḷù kménwalu garé,ˈ kepé mən-maʿdắn-e ṭuranè.ˈ palṭìwalu,ˈ kmènwalu,ˈ zabnìwalu.ˈ mandénwa ga-pliyáw-e xéta ke-bănăké mandéwalu báqa d-èa.ˈ ʾay-guzá moḥkàm sămə́x rešéf.ˈ ʾèele.ˈ lìtwalu baté rab-komót mangól ga-xárəj xắexin.ˈ doká fawqéf hítwa təlḥà ṭăbăqé.ˈ m-təlḥá ṭăbăqé bi-zóa lìtwa.ˈ ʾəstəqamát lìtwale,ˈ xéta lítwale năṭə̀re.ˈ là-kewale mən-təlḥá ṭăbăqé bi-zóa,ˈ mumkə́n-yele lăpə̀lwa.ˈ bănáe Kurdəstā́n mən-təlḥá ṭăbăqé bi-zóa là tarṣíwa.ˈ ʾèele.ˈ |
|